Mori detyrën e sekretarit të Jashtëm, Cameron nis vizitën e parë zyrtare në Ukrainë

Sekretari i ri i Jashtëm i Britanisë së Madhe (i cili ka qenë edhe kryeministër), David Cameron, ka bërë vizitën e tij të parë të punës në Ukrainë, duke takuar presidentin Volodymyr Zelensky në Kiev.

Sipas BBC, Cameron përsëriti mbështetjen e Mbretërisë së Bashkuar për Ukrainën duke premtuar se do të jetë atje për “sado kohë që të duhet”.

Ai premtoi se do të vazhdojë “mbështetjen morale, diplomatike, ekonomike, por mbi të gjitha ushtarake” të Britanisë.

Zelenksy falënderoi Cameron për mbështetjen e vazhdueshme të Mbretërisë së Bashkuar.

Presidenti ukrainas e uroi Cameron për emërimin e tij të ri dhe e falënderoi atë për vizitën e tij të parë të punës në Kiev në pozicionin e tij të ri.

“Kjo është shumë e rëndësishme, veçanërisht tani, kur bota po i kushton vëmendje jo vetëm situatës në fushën e betejës në Ukrainë”, tha Zelensky, duke aluduar për Lindjen e Mesme.

“Ne jemi mirënjohës për mbështetjen e palëkundur të Ukrainës nga Mbretëria e Bashkuar. Ne jemi mirënjohës për pritjen e ngrohtë të qytetarëve ukrainas në MB. Dhe ne jemi të lumtur që keni ardhur në Ukrainë,” tha ai.

Zelensky postoi një video të shkurtër të takimit në mediat sociale, gjatë së cilës Cameron mund të dëgjohet duke thënë “Doja që kjo të ishte vizita ime e parë”.

“Ajo që dua të them duke qenë këtu është se ne do të vazhdojmë t’ju japim mbështetjen morale, mbështetjen diplomatike dhe mbështetjen ekonomike dhe mbi të gjitha mbështetjen ushtarake që ju nevojitet jo vetëm këtë vit dhe vitin e ardhshëm, por sado kohë që të duhet”, tha Cameron.

Ish-kryeministri i Mbretërisë së Bashkuar shtoi: “Kam pasur disa mosmarrëveshje me Boris Johnson, ne jemi njohur për 40 vjet, por mbështetja e tij për ju ishte gjëja më e mirë që ai dhe qeveria e tij bënë”.

Postimi i ri i Cameron shënon rikthimin e tij në tryezën e kabinetit për herë të parë në më shumë se shtatë vjet.

Ai ka zëvendësuar James Cleverly, i cili u zhvendos në postin e sekretarit të Brendshëm për të marrë detyrën nga Suella Braverman, pas ndryshimeve të kabinetit të Rishi Sunak të hënën.

LEXONI GJITHASHTU:

• Ukraina thotë se situata në jug dhe lindje mbetet e “vështirë”
• Rusia sulmon Kievin dhe rajonet lindore dhe jugore të Ukrainës