OSBE/ODIHR publikon raportin për zgjedhjet, 274 vëzhgues në të gjithë vendin

OSBE/ODIHR do të dërgojë për monitorimin e zgjedhjeve parlamentare në Shqipëri, 24 vëzhgues afatgjatë dhe 250 vëzhgues të tjerë që do të jenë të pranishëm vetëm ditën e votimit dhe procesin e numërimit dhe nxjerrjen e rezultatit.

Në raportin mbi nevojat për zgjedhjet e 25 prillit, OSBE/ODIHR thotë se fushata zyrtarisht nis me 26 mars ndërsa deri tani nuk ka asnjë sanksion për nisjen para kohe të fushatës.

Nisur nga situata e polarizuar, OSBE/ODIHR në raport vlerëson nevojë për një mision vëzhgues në shkallë të gjerë për të mbuluar të gjitha qarqet e vendit për të siguruar kontroll të pavarur të zbatimit të ligjit, përfshirë identifikimin biometrik të votuesve, një praktikë që do të zbatohet për herë të parë në Shqipëri.

OSOBE/ODIHR thotë në raport se zgjedhjet e 25 prillit do të mbahen në sfondin e marrëveshjes politike të arritur në qershor të 2020 pas një periudhe të gjatë rruge qorre mes forcave kryesore në vend.

Gjithashtu thuhet se zgjedhjet e ardhshme parlamentare do të mbahen në kontekstin e një mosbesimi të thellë mes Partisë Socialiste në pushtet dhe opozitës së drejtuar nga Partia Demokratike.