Sfida e pretendentëve, Kukësi-Partizani zbresin në fushë për tri pikë

Kukësi-Partizani është ndeshja më interesante e javës së 20-të në Kategorinë Superiore. “Demat” kanë mundur të marrin maksimumin në dy takimet e para dhe verilindorët kërkojnë me çdo kusht suksesi në përballjen e kësaj të diele. Në kampin kuksian pretendojnë suksesin edhe për të qëndruar në garë për titullin kampion.

“Të dyja skuadrat do të futen në fushë për të fituar ndeshjen dhe nuk ka kënaqësi me barazimin. Normalisht e kemi përgatitur ndeshjen së bashku me stafin dhe lojtarët në formën tonë, për ta përballuar Partizanin”, tha trajneri Mirel Josa.

Në kampin e kuq janë koshientë për vështirësinë e kësaj përballjeje. Trajneri Ilir Daja kërkon që skuadra të bëjë akoma dhe më mirë se në ndeshjet e para. 

“Do jetë një ndeshje e vështirë, pasi duhet të jemi shumë më të vëmendshëm se dy ndeshjet e para,për faktins e edhe Kukësi kërkon të reagojë. Nëse duam të shkëputemi me një rival si Kukësi, duhet të jemi të kujdesshëm dhe të vëmendshëm, në mënyrë që atë që kemi bërë në dy ndeshjet e para dhe këtë diferencë që kemi ta shtojmë akoma dhe më shumë. Krahasimi me një ndeshje boksi? Do mundohemi të mos hamë shumë grushte për të kundërsulmuar e të shkojmë drejt “knock out“,  tha Daja.

Nga kjo përballje synon të përfitojë dhe Vllaznia, që ndaj Skënderbeut ka si objektiv maksimumin dhe të thellojë diferencën me ndjekësit.

“Kemi punuar gjatë gjithë javës me përkushtim për ndeshjen me Skënderbeun. Duhet të fokusohemi te fusha pasi do të kemi disa ndryshime në formacion. Lojtarët që do të zbresin në fushë do të kenë mundësinë të japin maksimumin”, shtoi Thomas Brdarić.