Forcat izraelite ndalojnë drejtorin e spitalit al-Shifa të Gazës

Forcat izraelite kanë arrestuar drejtorin e spitalit al-Shifa të qytetit të Gazës për t’u marrë në pyetje, një javë pas bastisjes së tyre të diskutueshme atje.

Sipas BBC, Dr Mohammed Abu Salmiya u mbajt në një pikë kontrolli ndërsa evakuonte pacientët në jug, tha një koleg për BBC.

Ushtria izraelite tha se ai po merrej në pyetje për prova se al-Shifa “shërbente si një qendër komandimi dhe kontrolli i Hamasit”. Ai dhe Hamasi e kanë mohuar këtë.

Izraeli nisi një fushatë të madhe ushtarake në Rripin e Gazës me objektivin për të shkatërruar Hamasin, të cilin e klasifikon si një organizatë terroriste, në përgjigje të një sulmi të paprecedentë ndërkufitar më 7 tetor, në të cilin u vranë rreth 1200 njerëz dhe rreth 240 të tjerë u morën peng.

Qeveria e Gazës e drejtuar nga Hamasi thotë se më shumë se 14,500 njerëz janë vrarë në territorin palestinez që nga fillimi i sulmeve ajrore dhe tokësore izraelite, ndërsa Kombet e Bashkuara kanë paralajmëruar për një krizë humanitare.

Të mërkurën, Izraeli dhe Hamasi ranë dakord të shkëmbejnë 50 nga pengjet – të gjithë fëmijë dhe gra – për një pauzë katër-ditore në luftime.

Ndërmjetësi që ishte Katari thotë se armëpushimi do të fillojë në orën 07:00 me orën lokale (05:00 GMT) të premten, me grupin e parë prej 13 pengjesh që do të lirohet në orën 16:00.

LEXONI GJITHASHTU:

• Izraeli dhe Hamasi bien dakord për armëpushim dhe lirim pengjesh
• Kryeministri i Libanit: Dy gazetarë janë vrarë nga sulmet izraelite në kufi