Viktimat e COVID-19l Mbi 54% e qytetarëve s’u besojnë shifrave, Nikolla: Të dhënat mund të rishikohen

Mbi 54% e qytetarëve të pyetur në sondazhin e Euronews Albania nuk u besojnë shifrave zyrtare për numrin e viktimave nga COVID-19. Në sondazhin e dytë ka një rritje të mosbesimit nga 40.3% në 54.4%.

Zv.ministri i Shëndetësisë, Albert Nikolla tha se “qeveria ka bërë menaxhimin më të mirë të mundshëm të pandemisë” dhe përparësi i është dhënë shëndetit.

“Kushtetuta thotë të mbrojmë shëndetin e njerëzve nuk thotë të mbrojmë ekonominë”, tha ai.

Egla Bardhi, drejtore e shoqatës “Together for Life” thotë se përqindja e qytetarëve mosbesues mund të ishte edhe më e lartë.

Kurse për shifrat e viktimave, z. Nikolla tha se për shifra e lajmëruar nga shteti “nuk duhet të ketë as dyshimin më të vogël”, por nga ana tjetër shtoi se nuk përjashtohet mundësi që numri real të jetë më i lartë.

“Unë nuk e përjashtoj mundësinë që një person që ka vdekur nga COVID nuk është futur, por kjo nuk i bën të pavërteta këto shifra. Këto të dhëna mund të përmirësohen dhe shikohen më vonë”, tha ai.

Kurse kryeredaktori i Euronews Albania, Mentor Kikia thotë se “ka qytetarë që vdesin jashtë vendit dhe nuk klasifikohen si viktima apo edhe persona që ndërrojnë jetë në kushtet e shtëpisë”.