Mbi 200 ankesa dorëzohen në PZAP për të kundërshtuar rezultatin zyrtar të zgjedhjeve në Kosovë

Pas publikimit të rezultatit zyrtar të zgjedhjeve të 14 shkurtit nga Komisioni Qendror i Zgjedhjeve në Kosovë, sot pranë Panelit Zgjedhor për Ankesa dhe Parashtresa (PZAP) janë paraqitur 208 ankesa nga kandidatë që morën pjesë në zgjedhje, të cilët kundërshtojnë rezultatin final.

“Ju njoftojmë se kandidatët e subjekteve politike brenda afatit prej 24 orëve në PZAP kanë paraqitur 208 apele, kundër rezultatit përfundimtar të zgjedhjeve të publikuara nga KQZ-ja”- thuhet në njoftim të PZAP, raporton “Kosovapress”.

Autoritetet për ankesat dhe Parashtesat shtojnë se janë në procedim/administrim të ankesave dhe ende nuk kanë mundësi që të informojnë lidhur me numrin e kandidatëve të subjekteve politike për secilin subjekt, të cilat kanë parashtruar apele në PZAP-në lidhur me publikimin e rezultateve përfundimtare të zgjedhjeve.

Afati për paraqitjen e ankesave ka përfunduar në orën 11:25 ndërsa lidhur me këto apele do PZAP-ja t’i shqyrtohet brenda afatit ligjor prej 72 orëve.