Shtrenjtohen me 15% çmimet e banesave në Vlorë, shkak rritja e taksave

Paketa e re fiskale, e hyrë në fuqi nga 1 Janari prek veçanërisht ndërtimin. Aktualisht taksa e ndikimit në infrastrukturë ka kapërcyer nga 4 në 6 % duke u reflektuar me një rritje të çmimit nga 10- 15% kryesisht në brendësi të qytetit pas  çmimi në zonat rezidenciale përgjatë detit nuk pritet të njoh ndryshime.

Kreu i dhomës së Tregtisë dhe Industrisë, Arben Breshani sqaroi se është arritur dakordësi për ambjentet e përbashkëta por jo plotësisht sipas kërkesave të ndërtuesve.

 “Kërkesat tona ishin që kjo taksë të mos bëhej e menjëhershme, që këtë vit, por të shtyhej për vitin tjetër dhe të mos ishte e gjithë zona e qytetit të Vlorës me këtë rritje 50%. Në një fare mase e arritëm ne disa zona, por jo në të gjitha ato që kërkuam.

Ajo qe është me e rëndësishme për ne tani janë sipërfaqet e përbashkëta, u dakordësuam me administratën e bashkisë që do të hiqeshin sipërfaqet e përbashkëta, kjo ndikon deri në 20% në çmimin e ndikimit të taksës në infrastrukturë”.

Breshani, tha se do të ulen në diskutime me bashkinë edhe për ndryshime më planin urbanistik vendor, veçanërisht për lartësitë e lejuara të ndërtimit.

“Janë shumë zona me 4 ose 5 kate ndërkohë që është një qytet në zhvillim dhe duhet të jenë me 10-12 kate prandaj është shumë e domosdoshme që të rritet dhënia e lejeve të ndërtimit. Po, ka pasur iniciativa me bashkinë madje ne do ulemi sërish grupi i inxhiniereve dhe ndërtuesve te qytetit për të parë edhe një herë planin rregullues te qytetit pasi është një plan qe vërtet ka ndryshuar gjeografia e qytetit tone, nuk është me Vlora e dikurshme por një Vlore që kërkohet shume nga turizmi”

Ndërtuesit shpresojmë të gjejmë dakordësinë e bashkisë edhe për territore të reja ndërtimi në fushën e ndërtimeve civile.

LEXONI GJITHASHTU:

• Përplasjet mes Bardhit e Açkës, gratë e PD protestë kundër dhunës! Jupi: S’tolerohet
• Rriten me 50% taksat për bizneset. Tregtarët në Pogradec protestojnë para bashkisë