Liverpool i pandalshëm, kampionët e Evropës regjistrojnë fitoren e 21-të në Premier League 

Liverpool nuk njeh rival këtë edicion, teksa ka mundur dhe Manchester United në derbin e Anglisë mbrëmjen e së dielës. “The Reds” triumfuan me rezultatin 2-0 në një ndeshje me ritëm. Kampionët e Evropës kanë një ecuri mbresëlënëse, pasi kjo ishte fitorja e 21-të nga 22 ndeshjet e këtij kampionati.

Virgin Van Dijk shënoi golin e parë të ndeshjes. Qendërmbrojtësi tregoi dhe një herë aftësitë e tij në luftën në ajër, duke kërcyer më shumë se të gjithë e duke përshëndetur rrjetën e djajve të kuq.

VAR po ashtu ishte protagonist në këtë përballje, por pa ndryshuar fatin e takimit.

Goli që kristalizoi rezultatin përfundimtar u shënua në sekondat e fundit të ndeshjes. United në kërkim të golit të barazimit kishte harruar Mohamed Salah, i cili mori një top të gjatë nga portieri Alison, duke shënuar golin e dytë të ndeshjes.

Një fitore e madhe që thellon akoma dhe më shumë diferencën me Manchester City, që ndodhet 16 pikë pas, ndonëse me një ndeshje më shumë se Liverpool.

Në ndeshjet e tjera të javës së 23-të mund të veçohet barazimi i Arsenal me Sheffield United si dhe humbja e Chelsea me Newcastle.