60 pedagogë në Korçë marrin dozën e parë të vaksinës AstraZeneca

Pas vaksinimit të mësuesve, në qarkun e Korçës ka nisur vaksinimi i pedagogëve të universitetit .

Sipas drejtorit të njësisë së kujdesit shëndetësor Mikel Llogori janë 130 pedagogë që do marrin vaksinën AstraZeneca në dy ditë.

Këtë të enjte u vaksinuan 60 prej tyre.

“Kemi filluar vaksinimin e stafit pedagogjik të Universitetit “Fan Stilian Noli”. Është dita e parë, janë planifikuar që rreth 60 pedagogë të vaksinohen ditën e sotme dhe nesër të vazhdojmë me pjesën tjetër,” – u shpreh Llogori.

Njëra nga pedagoget e cila ka marrë vaksinën shprehet se nuk ndihej e frikësuar dhe kjo është e vetmja mënyrë për të mbrojtur veten dhe komunitetin.

“Po, unë isha e vendosur për ta bërë sigurisht. Ndihem shumë mirë sot, nëse më pyesni nesër ndoshta do të jem ndryshe por sot jam shumë mirë sepse e mora me sportivitet dhe përgjegjshmëri,” – tha pedagogia, Albina Pajo.

Përveç 130 pedagogëve që do të vaksinohen, pjesë e stafit të shërbimit në universitet janë edhe 110 persona të tjerë që presin radhën të vaksinohen.