Partizani-Teuta, sfida e titullit luhet të dielën

Partizani dhe Teuta do të luajnë një ndeshje titulli këtë të diel. Pas 24 javësh të dyja skuadrat e shohin veten në kuotën e 42 pikëve, 1 më pak se vendi i parë që mbahet nga Laçi. Demat synojnë vazhdimësinë pas suksesit në derbi, por nuk do të jetë e lehtë, ndaj një kundërshtari mjaft kompakt.

Kryesuesit e Laçit duan të përfitojnë nga përballja e ndjekësve dhe përballë Tiranës kanë si objektiv suksesin që të marrin arratinë në vendin e parë.

Me vetëm 1 fitore në 9 javë Vllaznia kërkon kthesën ndaj Kastriotit. Shkodranët kanë humbur vendin e parë, por synojnë që të shfrytëzojnë entuziazmin që u dha kualifikimi në kupën e Shqipërisë për të marrë një sukses që do i ndihmonte shumë në këtë momente.

“Më rëndësishmja është të besojmë te fitorja nesër dhe të jemi në maksimumin tonë për t’ia dalë. I njohim anët e forta të Kastriotit, janë të përgatitur fizikisht dhe të konsoliduar. Kemi përgatitur një plan ndaj Kastriotit, që të dominojmë nesër dhe të arrijmë fitoren”, tha trajneri i Vllaznisë, Thomas Brdariç.

Te Kastrioti janë të vetëdijshëm që nuk do të jetë një ndeshje e lehtë, megjithatë do të tentojnë që të marrin maksimumin pavarësisht se kanë vetëm një sukses në 5 sfidat e fundit.

Në takimet e tjera Kukësi do të matë forcat me Bylisin, ndërsa Apolonia takon Skënderbeun.