Duma: Marrim 22-23 mandate në Tiranë, Haxhinasto: Tejkalojmë rezultatin e 2017-s

Grida Duma, anëtare e kryesisë së Partisë Demokratike dhe kandidate në Tiranë me numrin 8 në listat e votimit dhe Edmond Haxhinasto, ish-deputet i Lëvizjes Socialiste për Integrim dhe kandidat në Tiranë, i cili në listat e votimit mban numrin 6, gjatë intervistës në “Ilva Now” në Euronews Albania u shprehën të bindur në fitoren e opozitës në zgjedhjet e 25 prillit.

Znj. Duma e pyetur se cili është objektivi i opozita nuk dha një përgjigje për rangun kombëtar por bëri një parashikim për rezultatin e Qarkut të Tiranës.

“Koalicioni opozitar do të arrijë në nivelin 22-23 mandate”, deklaroi anëtarja e kryesisë së PD-së.

Ndërsa Edmond Haxhinasto tha se rezultati i LSI do të jetë më i mirë se sa i në zgjedhjet e kaluara kur siguruan 19 mandate.

“Shumë më të larta se sa japin sondazhet. LSI do u surprizojë dhe do të dalë përtej mandateve që japin sondazhet. Më mirë se sa në 2017. Rezultati kombëtar ka rëndësi dhe do të jetë më i madh”, tha ai.

Të pyetur nëse do ta njohin rezultatin e zgjedhjeve në rast humbjeje, znj. Duma tha se “do ta njohim se do të jetë fitore”, kurse z. Haxhinasto u shpreh se “nëse do të ketë zgjedhje të lira dhe të ndershme do të njohim çdolloj rezultati”.