Shtrëngim i masave anti-COVID gjatë fushatës? Rakacolli: Nëse zbatohen rregullat, s’ka rrezik për infektime

Zv. ministrja e Shëndetësisë Mira Rakacolli tha për Euronews Albania se vendimi i marrë sot nga Komiteti Teknik i Ekspertëve për të mbajtur të pandryshuar edhe me dy javë masat anti-COVID është në përputhje me indikatorët që janë numri i rasteve të reja, numri i incidencave, numri i të shtruarve në spital, numri i personave që kanë nevojë për kujdes intensiv dhe numri i jetëve të humbura.

Sipas saj, nisur edhe nga përvoja e vendeve të tjera të rajonit që kanë pasur procese zgjedhore gjatë pandemisë, është konfirmuar se nëse zbatohen siç duhet masat anti-COVID, gjasat që të kemi shtim të numrit të infektimeve gjatë fushatës janë të vogla.

Zv.ministrja u shpreh procesi i vaksinimit është duke ecur me ritme të kënaqshme teksa theksoi se objektivi është që të realizohen nga 12-15 mijë vaksinime në ditë.

Znj. Rakacolli tha se mbrëmjen e sotme pritet të finalizohet marrëveshja për sasinë e vaksinave kineze që do të merren nga Shqipëria, ndërsa mohoi që nga ana e qeverisë të ketë pasur mungesë preference për vaksinën ruse. Skepticizmi për këtë të fundit sipas zv.ministres së Shëndetësisë lidhej më herët me mungesën e studimeve të mjaftueshme lidhur me sigurinë dhe efikasitetin e saj.

“Qeveria synon që çdo vaksinë të jetë e sigurt. Kur flitej për vaksinën ruse në atë kohe nuk kishte studime të mjaftueshme, që atëherë ka ecur procesi i vaksinimit në botë dhe janë grumbulluar mjaftueshëm të dhëna. Komiteti i Vaksinimi që funksionin prej kohësh edhe para pandemisë është i  përbërë vetëm nga ekspertë, duke studiuar të dhënat i sugjeroi bindshëm Ministrisë së Shëndetësisë që përdorimi i tyre është po aq efikas sa Pfizer dhe AstraZeneca”, shpjegoi znj. Rakacolli.