“Politika mundi ekonominë”, Safet Gërxhaliu: Ndihma e qeverisë jo e efektshme

Pandemia e Covid-19 si kudo tjetër edhe në Kosovë ka shkaktuar pasoja të forta ekonomike dhe sociale. I pyetur nga Euronews Albania, eksperti i ekonomisë Safet Gërxhaliu u shpreh se gjatë këtij viti, megjithëse në pandemi, ka dominuar axhenda politike në vend të asaj ekonomike.

“Kosova kohën e fundit ka gjeneruar më tepër agjendë politike se sa agjendë ekonomike.  Në rend të dytë, ku dominon agjenda politike në këto kohë pandemie e pëson populli, e pëson ekonomia”, tha ai.

Për Gërxhaliun, sektorët më të prekur kanë qenë gastronomët dhe shërbimet, ndërkohë që paketat ndihmëse i vlerësoi si jo të efektshme mbi krizën.

“Ka pësuar më tepër qytetari dhe sektori privat. Nuk e kanë guximin të veçojnë ndonjë sektor, që ka pësuar më shumë apo dhe më pak e kanë pësuar  nga pandemia, por besoj se gastronomia, shërbimet, ndërtimtaria, kanë qenë ato që kanë qenë  më të goditura, por kësaj i shtohen fakti tjetër se në Kosovë ka pasur ndihmë të vogël nga institucionet për të minimizuar pasojat e Covid-it. Kosova do të ballafaqohet nga një pandemi ekonomike, dhe me një pandemi sociale në të ardhme”, shtoi Gërxhaliu.