Hoti e Osmani falenderojnë Palmerin: SHBA aleat i përhershëm i Kosovës

Kryeministri në detyrë i Kosovës Avdullah Hoti dhe Presidentja në detyrë Vjosa Osmani zhvilluan sot takime online me zëvendës-ndihmës sekretarin amerikan të Shtetit Matthew Palmer.

Hoti dhe Palmer biseduan për zhvillimet e përgjithshme politike në vend, si dhe për sfidat me të cilat por përballet Kosova, pasojat e pandemisë COVID-19, si në aspektin shëndetësor ashtu edhe në atë ekonomik, por edhe në fusha të tjera të jetës.

Ai ka falënderuar Palmerin për bashkëpunim dhe mbështetjen e vazhdueshme të SHBA-ve për Kosovën në të gjitha etapat e shtet-ndërtimit.

Edhe ushtruesja e detyrës së presidentes së Kosovës Osmani mbajti një takim me Palmerin online. Ky i fundit i përcoll iasaj urimet për rezultatin në zgjedhjet e 14 shkurtit, duke theksuar rëndësinë e themelimit të institucioneve në reflektim të vullnetit të qytetarëve të Kosovës.

Në diskutim me Palmerin Osmani theksoi se për shkak të pandemisë, sigurimi i vaksinave të mjaftueshme për qytetarët dhe menaxhimi i pandemisë e ringritja ekonomike duhet të jenë prioritete të institucioneve të reja.

Sa i përket bisedimeve me Serbinë, Osmani tha se në Kosovë është mirëpritur jashtëzakonisht shumë qasja e qartë e presidentit Joe Biden, se dialogu duhet të përqendrohet në njohjen reciproke, ndërkaq shtoi se institucionet e Kosovës duhet të flasin me një zë, e në këtë kontekst përmendi rëndësinë e bashkëpunimit me opozitën e me shoqërinë civile si dhe koordinimin e vazhdueshëm me aleatët tanë.

Nga ana tjetër, Palmer konfirmoi që në procesin e dialogut, SHBA do të jetë e përfshirë si partner dhe duke i koordinuar qëndrimet me Bashkimin Evropian, ndërsa theksoi se SHBA mbetet të aleat i përhershëm i popullit të Kosovës.