Aplikimi për vaksinën kalon online në portalin qeveritar

Me nisjen e vaksinimit masiv, qytetarët shqiptarë mund të bëjnë një kërkesë online në platformën e-Albania për t’u vaksinuar kundër COVID-19.

Ky lajm është dhënë nga drejtorja e Agjencisë Kombëtare të Shoqërisë së Informacionit, Linda Karçanaj, e cila përmes një postimi në Facebook, shpjegon procedurën online, që sipas saj zgjat vetëm pak sekonda.

“Me nisjen e vaksinimit masiv, tashmë qytetarët bëjnë kërkesë në platformën e-Albania për t’u vaksinuar ndaj Covid 19”, shkruan Karçanaj.

Qytetarët sapo të futen në portalin e-albania, duhet të shkruajnë ‘kërkesë për vaksinim anti-COVID’ dhe menjëherë marrin miratimin online.

Drejtorja e AKSHI-t sqaron qytetarët se menjëherë pas kryerjes së aplikimit në e-Albania, do të njoftohen me mesazh ose përmes mjekut të familjes për datën e vaksinimit.

“Me një ndalesë online, në pak sekonda kryhet e gjithë procedura. Qytetarët do të njoftohen përmes një SMS-je në celular ose do të kontakohen nga mjeku i familjes për datën e vaksinimit. E-Albania është krijuar për të lehtësuar jetët e gjithkujt dhe ky shërbim, në këtë moment, është lehtësia më e madhe për këdo!”, shprehet Linda Karçanaj.

Ditën e djeshme nisi vaksinimi masiv në “Sheshin Skënderbej” në Tiranë. Ministrja e Shëndetësisë, Ogerta Manastirliu ka deklaruar se deri tani janë kryer mbi 78 mijë vaksinime.

Lexoni gjithashtu:

Vaksinimi masiv, të moshuarit mbi 75 vjeç marrin dozën e parë të “Sinovac”

Nis vaksinimi masiv në sheshin “Skënderbej”, synohen 1 mijë vaksinime në ditë me kinezen ‘Sinovac’