Tenis, Andrey Rublev me fat, kalon në gjysmë-finale të Qatar-Open pa luajtur asnjë ndeshje

Tenisti rus Andrey Rublev ka shkruar emrin në historinë e tenisit botëror duke mos shkelur fare në fushë.

Njëzetetrevjeçari, i cili javën e shkuar në Rotterdam fitoi titullin e pestë ATP-500, ka mundur të sigurojë gjysmë-finalet e Qatar-Open pa luajtur asnjë set të dy ndeshjeve që kishte në program.

Për shkak të rendimentit të mirë gjatë sezonit atij i qe dhënë lojë të lirë për raundin e parë dhe kishte kaluar direkt në 1/8-at.

Në këtë fazë ishte parashikuar të luante kundër Richard Gasquet, por francezi u tërhoq për shkak të një lëndimi.

Në çerekfinale përballë u caktua të ishte Marton Fucsovics, i cili pati humbur finalen me Rublev në Rotterdam.

Sidoqoftë edhe Fucsovics u detyrua të tërhiqej për shkak të një problemi fizik. Kështu Rublev kalon direkt në gjysmë-finale, gjë që në turnetë ATP nuk ndodhte prej vitit 1990 që një lojtar të vijonte më tej pa luajtur asnjë ndeshje.

Të premten Rublev pritet të luajë ndeshjen e parë kundër fituesit të çiftit çerek-finalist Roberto Bautista Agut dhe Dominic Thiem.