Uji iku, po paratë? Banorët e Nën-Shkodrës janë në pritje të dëmshpërblimeve

Banorët e Nën-Shkodrës janë në pritje të dëmshpërblimeve.

Njësia Administrative Ana e Malit është zona e fundit që po i nënshtrohet këtij procesi, pasi vetëm 2-3 ditë më parë, uji është larguar tërësisht nga tokat e tyre.

Rreth 1500 hektarë tokë qëndruan nën ujë për më shumë se 50 ditë e si pasojë dëmi në kulturat bujqësore është i madh.

Agim Tela është banor i lagjes Goricë dhe më shumë se 20 dynym pronë e tij, kanë qenë e përmbytur dhe dëmi është kolosal.

“Katundi im i ka dëmet më të mëdha se çdo katund tjetër”, u shpreh fermeri.

Fermeri thotë se vetëm shpronësimi në bazë të ligjit të digave mund të shpëtojë banorët e Anës së Malit, pasi përmbytja po bëhet e shpeshtë dhe toka po humbet funksionin.

Edhe për Ramazan Rrustjen, banor i Goricës situata është shumë problematike pasi të vetmet të ardhura për fshatin janë prodhimet bujqësore.

“Po kjo jonxhe sot nuk del më, duhet të punohet dhe të mbillet prapë. Përmbytemi për çdo vit, kështu nuk punohet”, tha ai.

Afrimi i zgjedhjeve mban me shpresë fermerin pasi vetëm qeveria mund të dëmshpërblejë dëmin e shkaktuar nga përmbytja.

E me ndihmën dhe përkujdesjen e qeverisë, fermeri lidh edhe të ardhmen e fshatit, që dita ditës po braktiset.

Administratori Arben Ceni thotë se këtë vit tokat u mbollën më shumë si pasojë e mbylljes së kufijve e si pasojë vlera e dëmit e tejkalon përmbytjen e vitit 2018.

Lexoni gjithashtu:

Përmbytjet, nis verifikimi, grupet e punës së bashkisë Shkodër nisin punën nga Muriqani

Në pritje të dëmshpërblimit, nis verifikimi i dëmeve në tokat e përmbytura të Nënshkodrës