Kalon për gjykim ‘Dosja 184’ me vetëm katër të pandehur

Gjykata e Dibrës ka vendosur sot që të kalojë për gjykim ‘Dosjen 184”, me vetëm 4 të pandehur, Robert Agën, Drini Gjecin, Nuri Medën dhe Hasan Hotin.

Sakaq, është pushuar çështja për Dionis Imerin dhe personat e tjerë.

Ndërkohë, Partia Demokratike nën cilësinë e kallëzuesit ka kërkuar që çështja t’i kalonte për kompetencë GJKKO-së.

Hetimi për të ashtuquajturën “Dosje 184” kaloi një kalvar të gjatë prej së paku pesë herë lëvizjesh mes prokurorive mes asaj të Tiranës dhe asaj të Dibrës.

Struktura e Posaçme Anti-Korrupsion (SPAK) në fund vendosi t’ia lërë si hetim prokurorisë së Dibrës, ndërsa hetime të tjera për rrjedhjen e disa prej përgjimeve nuk nxorën asnjë rezultat, së paku të deklaruar në publik.

Çështja në fjalë lidhet me zgjedhjet e parakohshme lokale të vitit 2016, kur asokohe pas shkarkimit të Shukri Xhelilit, Dibra iu drejtua sërish zgjedhjeve nga të cilat fitues u shpall kandidati socialist Muharrem Rama. Ky i fundit përballë kishte si kundërshtar nga opozita ish-deputetin njëherësh ish-zëvendësminitër i Financave, Sherefedin Shehu.

Opozita i kundërshtoi rezultatet e zgjedhjeve dhe rreth tre vite më vonë përgjime të rrjedhura nga prokuroria nxorën në media biseda mes zyrtarëve të Partisë Socialiste dhe disa personave, një pjesë e të cilëve dëgjoheshin teksa ndikonin apo urdhëronin të tretë për të ndikuar në rezultatet e zgjedhjeve.