“Kemi denoncuar raste të panumërta të shit-blerjes së votës”, Ivi Kaso akuzon mazhorancën për vonesa në ngritjen e institucioneve

Ivi Kaso tha në Ilva Now se vonesat për ngritjen e institucioneve të reja dhe rrjedhimisht vonesat në gjithë proceset erdhën mbas reformës konsensuale të korrikut ku mazhoranca në një “aventurë kushtetuese”, siç e quajti dhe ai, ndryshoi e vetme Kushtetutën dhe ligjin zgjedhor.

Eksperti i çështjeve zgjedhore për Partinë Demokratike u shpreh se ka raste të panumërta të shit-blerjes së votës, të cilat ata i kanë denoncuar, referuar këtu dhe deklaratës së ambasadores Yuri Kim për të mos e lënë votën në dorë të askujt.

“Veçanërisht, qyteti i Tiranës, që është dhe qarku më i madh dhe beteja më e fortë zgjedhore ka problematikat më të rënda, sa i përket dhe abuzimit me resurset shtetërore, kjo për shkak edhe të institucioneve qendrore që selinë e tyre e kanë në to dhe nga buron aktiviteti i paligjshëm, por ka shqetësime të tjera të mprehta, që lidhen dhe me inflirtrimin e krimit të organizuar në fushatën zgjedhore,” – u shpreh Kaso duke theksuar se Partia Demokratike nuk është e përfshirë në skema të tilla.

Ndërkaq pyetur për balancën që duhet të krijojë midis angazhimit politik dhe mbikëqyrjes së procesit zgjedhor, sekretari i çështjeve zgjedhore në PD tha se ky ishte një “ekuacion jo i lehtë” për t’u çuar deri në fund me sukses por sidoqoftë pohoi se nuk është i vetmi në grupin e tij i cili ka “të tillë presion pune”.