“Ka ardhur koha për armëpushim”, Blinken i drejtohet Izraelit dhe Hamasit

Sekretari amerikan i Shtetit, Antony Blinken, takoi liderët izraelitë më 1 maj, gjatë vizitës së tij në Izrael, dhe i tha presidentit të vendit se “ka ardhur koha” për një marrëveshje armëpushimi në luftën në Gazë.

Kjo është vizita e shtatë e Blinkenit që nga fillimi i luftës midis Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – në tetor. Ai po përpiqet të arrijë një marrëveshje armëpushimi, që do të lironte pengjet e mbajtura nga militantët e Hamasit në këmbim të ndalimit të luftimeve. Të burgosurit palestinezë gjithashtu pritet të lirohen si pjesë e marrëveshjes.

Blinken ka fajësuar Hamasin për çdo vonesë në arritjen e një marrëveshjeje.

“Ne jemi të vendosur të arrijmë një armëpushim që sjell pengjet në shtëpi dhe ta arrijmë atë tani, dhe arsyeja e vetme që kjo nuk do të arrihej është për shkak të Hamasit”, tha ai.

Blinken vizitoi udhëheqësit kryesorë rajonalë në Arabinë Saudite dhe Jordani përpara se të mbërrinte në Izrael. Ai u takua me presidentin izraelit, Isaac Herzog, dhe do të takohej më vonë me kryeministrin Benjamin Netanyahu. Sipas Departamentit amerikan të Shtetit, ai do të takohet edhe me familjet e pengjeve si dhe do të vizitojë një port izraelit ku po lekohet hyrja e ndihmave humanitare që dërgohet në Gazë.

Marrëveshja në zhvillim mes Izraelit dhe Hamasit duket se po avancon, raporton agjencia e lajmeve AP, por një pikë kyçe ku ajo po ngec mbetet dyshimi nëse lufta do të përfundojë si pjesë e marrëveshjes – kërkesë që Hamasi e ka përsëritur e që Izraeli e refuzon.

LEXONI GJITHASHTU:

• Blinken drejt Lindjes së Mesme priten bisedime për Gazën dhe sigurinë rajonale
• Blinken: Kina ndihmon në nxitjen e kërcënimit rus ndaj Ukrainës