Situata epidemiologjike në RMV, mjeku Cana: Masat shtesë anti-COVID të domosdoshme

Situata epidemiologjike në Maqedoninë e Veriut është rënduar.

Vetëm gjatë 24 orëve të fundit, janë shënuar 41 viktima ndërkohë që me ritme të larta avancon edhe numri i të infektuarve.

Mjeku në Shkup, Fadil Cana u shpreh në Euronews Albania se shifrat janë shqetësuese dhe si shkak është varianti britanik i COVID-19.

“Numri i lartë i fataliteteve shënohet tek grupmoshat më të vjetra dhe ata që kanë sëmundje shoqëruese. Por, nuk përjashtohet që në numrin e fataliteteve të ketë edhe nga grupmoshat më të reja”, u shpreh ai.

Mjeku tregoi se kapacitetet e spitaleve janë pothuajse të tejmbushura.

“Por, çdo ditë në RMV hapen edhe kapacitete të reja”, tha ai më tej.

Sa i përket infektimit të fëmijëve, zoti Cana tha se numri i të infektuarve është i ulët.

“Klinika për sëmundje të fëmijëve që gjendet ne kampusin “Nëna Tereza” ka kapacitet të mjaftueshëm për hospitalizimin e fëmijëve që kanë nevojë për trajtim spitalor. Ai numër është shumë i vogël”, pohoi mjeku.

Sipas tij, fluksi i infektimeve mund të ulet nëse shtrëngohen masat anti-COVID në Maqedoninë e Veriut.

“Nevoja për marrjen masave shtesë është mëse e domosdoshme për uljen e fluksit”, përfundoi ai.

Lexoni gjithaqshtu:

41 të vdekur në Maqedoninë e Veriut nga Covid-19