Balla: Në Elbasan synojmë 9 mandate, Basha e Bardhi po u bëjnë presion kompanive të ndërtimit

Drejtuesi politik i Partisë Socialiste në qarkun e Elbasanit, Taulant Balla tha se synojnë të marrin nëntë mandate deputeti në këtë qark, nga 14 që ka në total. Këtë deklaratë z. Balla e bëri në studion e “Ilva Now” në Euronews Albania.

“Objektivi maksimal është nëntë mandate, objektivi minimal është tetë mandate. Drejtuesi politik merr përgjegjësinë aty ku është objektivi. Ne kërkojmë një mandat të tretë, sepse ne jemi votuar për të çuar përpara disa beteja”, tha ai.

Ai tha se Partia Socialiste suksesin në zgjedhje e pret nga puna që ka kryer në shtatë bashkitë e këtij qarku.

“Puna. Ne kemi punuar dhe nuk kemi fjetur gjumë, në shtatë bashkitë e qarkut kemi një bilanc pozitiv”, theksoi ai.

Po ashtu z. Balla akuzoi kundërshtarët politikë, të cilët sipas tij kanë ushtruar presioni ndaj kompanive të ndërtimit, ku u kanë kërkuar të mos respektojnë afatet e punimeve në objektet publike.

“Gaz Bardhi është një kalimtar, siç hyri doli dhe kështu do dalë në Elbasan. I bëj thirrje publikisht të heqë dorë bashkë me Bashën nga presioni që u bëjnë kompanive të ndërtimit që mos të respektojnë afatet e ndërtimit të objekteve publike. Unë të gjitha denoncimet e këtij lloji i bëj pa zhurmë sepse nuk kamë kohë për të humbur, njërëzit kanë nevojë për punë dhe ju për gjumë. Këto janë kompani publike”, tha Balla.

Lidhur me kallëzimet e Gazment Bardhit, se qytetarëve të Elbasanit u është bërë presion për ndihmën ekonomike nëse nuk votojnë Partinë Socialiste, z. Balla dha këtë përgjigje:

“Unë jam politikani që kundërshtarët e mi i kam drejtuar gjithmonë në prokurori. Jam politikani që i bëj thirrje prokurorisë të hetojë çdo pretendim të çdo kundërshtari. Sa i përket kësaj historie, edhe kjo histori të hetohet”, tha ai.

LEXONI GJITHASHTU:

• Taulant Balla thotë se listat e LSI-së në Elbasan fshehin njerëz që kanë probleme me drejtësinë
• Incidenti në Elbasan mes simpatizantëve PS-PD në 14 mars, Taulant Balla: Nuk shkohet në festë me flamuj partie
• Yuri Kim në Elbasan, Balla: Vlerësoj mesazhin për blerjen e votës, ligji do të godasë LSI-në