28 mijë persona u zhytën në varfëri, BB: Ekonomia do rritet 4.4 %, kufizime për turizmin

Përtej optimizmit të qeverisë për një hapje totale gjatë sezonit turistik, Banka Botërore parashikon se kufizimet do të jenë të pranishme për shkak të kohës që do marrë procesi i vaksinimit në të gjithë botën. Paralajmërimi është shkruar në raportin e fundit ekonomik për Europën dhe Azinë Qendrore, duke parashikuar një rritje ekonomike më të ulët se pritshmëritë e qeverisë.

“Turizmi dhe udhëtimet do të jenë të kufizuara derisa të bëhet shpërndarja globale e vaksinimit. Në këtë skenar, PBB parashikohet të rritet me 4.4 % në vitin 2021”, bën me dije Banka Botërore.

Ndërkohë, raporti thekson se 28 mijë njerëz u zhytën në varfëri, gjatë vitit të kaluar si rezultat i krizës që solli pandemia Covid-19.

“Varfëria është rritur me 1 pikë përqindje në vitin 2020, çka do të thotë se të ardhurat ditore për 28 mijë njerëz të tjerë ranë nën 5.5 dollarë”, thotë BB.

Me rritjen e aktivitetit ekonomik, të nxitur kryesisht nga procesi i rindërtimit, edhe të ardhurat pritet të rikuperohen, ndërsa Borxhi publik do të ulet në 79.5 për qind të Prodhimit të Brendshëm Bruto në 2021, nga 80 % që rezultoi në 2020-ën.