SHBA sanksione kundër 50 subjekteve për transferimin e parave për ushtrinë iraniane

Shtetet e Bashkuara të Amerikës vendosën sot sanksione kundër afro 50 subjekteve dhe individëve të akuzuar për transferimin e miliarda dollarëve për ushtrinë iraniane.

Departamenti amerikan i Thesarit tha se entitetet janë pjesë e një “rrjeti bankar në hije” të përdorur nga Ministria e Mbrojtjes dhe Logjistika e Forcave të Armatosura të Iranit (MODAFL) dhe Korpusi i Gardës Revolucionare Islamike (IRGC), raporton Reuters.

Ai rrjet financiar thuhet se ka ndihmuar MODAFL dhe IRGC të kenë akses në sistemin financiar ndërkombëtar dhe të përpunojnë miliarda dollarë në vitin 2020, tha Thesari i SHBA.

“Shtetet e Bashkuara po ndërmarrin veprime kundër një sistemi bankar të përhapur që funksionon nga hijet për të mirën e ushtrisë iraniane me detyrën e pastrimit të miliarda dollarëve në naftë dhe të ardhura të tjera të paligjshme”, tha në një deklaratë zëvendëspresidenti i Thesarit të SHBA Wali Adeyemo.

Paketa e sotme e sanksioneve synon disa kompani destinacioni në Hong Kong, Emiratet e Bashkuara Arabe dhe Ishujt Marshall, si dhe kompani në Iran dhe Turqi.

Masa ngrin të gjitha pasuritë e subjekteve dhe individëve të sanksionuar në SHBA dhe ndalon amerikanët të bëjnë biznes me ta.

Ata që kryejnë transaksione të caktuara me subjekte që i nënshtrohen regjimit të sanksioneve rrezikojnë të ekspozohen ndaj sanksioneve.