Çfarë ofron ekipi i Bashës për zgjedhjet e 25 Prillit? Jorida Tabaku në “Ilva Now”

Partia Demokratike dhe aleanca e saj në zgjedhjet e 25 prillit, cilat do të jenë shanset e ekipit të Bashës në këto zgjedhjet tashmë që edhe modeli i fletës së votimit u përcaktua.

Ish-deputetja e Partisë Demokratike, Jorida Tabaku përballë analistëve në emisionin Ilva Now në Euronews Albania u shpreh e bindur se PD më 25 prill do të ketë votën e shumë prej atyre që në 2013 votuan PS, duke pritur ndryshimin, teksa sipas saj janë të zhgënjyer nga 8 vjet keqqeverisje.

Sipas saj, PD gjatë fushatës derë më derë ka gjetur mbështetjen e të gjitha shtresave të popullsisë, që nga votues për herë të parë deri tek ish-të përndjekurit.

Znj. Tabaku nuk dha një përgjigje konkrete nëse PD do ta njohë rezultatin e zgjedhjeve në rast se do të jetë humbëse, por deklaroi se PD ka ngritur “grup për mbrojtjen e votës”, që sipas saj është një strukturë që identifikon problematikat në terren.

Ish-deputetja theksoi se nëse PD fiton zgjedhjet, atëherë ministrat nuk do të jenë të njëjtën që ishin kur qeverisi z. Berisha. Ajo u shpreh se Partia Demokratike është përgatitur për qeverisje.

“Z. Basha ka ekipin e vet që e ka nxjerrë në listat e veta dhe sigurisht që do të qeverisë me ekipin e tij. Ka persona që janë me integritet kanë punuar, kanë kontribuar për Partinë Demokratike”, u shpreh znj. Tabaku.

Për znj. Tabaku, premtimi i PD për të hapur 110 mijë vende të reja pune brenda 4 viteve të para të qeverisjes është i përllogaritur dhe plotësisht i mundshëm.

Sipas saj, 110 mijë vendet e punës do t’i krijojë ekonomia, gjë që siç tha ish-deputetja ka në bazë taksa e sheshtë.