Reagimet e Kremlinit për postet e BE: Rusofobë!

“Shanset për përmirësimin e marrëdhënieve BE-Rusi nuk duken të jenë aspak pozitive sidomos pas emërimeve ‘rusofobe’ në detyra kryesore të unionit”, ishte ky reagimi i Kremlinit pasi liderët e Unionit ranë dakord për 3 zyrtarët e lartë të unionit.

Zëdhënësi rus Dmitry Peskov u ndal në mënyrë specifike tek Ursula von der Leyen, e cila u emërua për një mandat tjetër si presidente e Komisionit Evropian, dhe kryeministrja e Estonisë Kaja Kallas, e zgjedhur si shefja e ardhshme e politikës së jashtme të BE-së.

“Zonja von der Leyen nuk është një mbështetëse e normalizimit të marrëdhënieve midis BE-së dhe Rusisë. Kështu e njohim dhe kështu e kujtojmë atë”, tha ai.

Duke iu kthyer kryeministres të Estonisë, Peskov shtoi se Kallas “nuk ka demonstruar prirje diplomatike deri më tani dhe është e mirënjohur për deklaratat e saj të papajtueshme dhe ndonjëherë edhe rusofobike”. Kallas ka qenë një nga kritikët më të hapur të Kremlinit brenda BE-së

Është e paqartë nëse komentet e Peskov kishin lidhje me ndonjë përpjekje specifike për normalizim midis të palëve. Marrëdhëniet midis Brukselit dhe Moskës kanë qenë të ftohta që nga nisja e luftës në Ukrainë.