Komiteti i Mbrojtjes Civile: MIE të zëvendësojë kontrollorët e larguar me të rinj, vendas ose të huaj

Qeveria ka vendosur të ndërhyjë “për ta kthyer operacional kontrollin e trafikut ajror”, qoftë edhe duke zëvendësuar punonjësit aktual me të rinj.

Me propozim të ministres së Infrastrukturës Belinda Balluku, “Komiteti i Mbrojtjes Civile”, i cili drejtohet nga Ministri i Mbrojtjes Niko Peleshi, ka vendosur që të marrë masat e nevojshme për të bërë operacional kontrollin e trafikut ajror, qoftë edhe duke zëvendësuar nëse lind nevoja kontrollorët e larguar me kontrollorë të rinj vendas ose të huaj.

“Ministria e Infrastrukturës dhe Energjisë në kuadër të situatës së krijuar, u ngarkua të përcaktojë kriteret minimale të licencës sipas standardeve ndërkombëtare si dhe çdo kriter tjetër të nevojshëm për të filluar fluturimet sa më parë,” – u tha në një njoftim për shtyp nga Komiteti i Mbrojtjes Civile.

“Autoriteti i Aviacionit Civil u ngarkua të marrë të gjitha masat e nevojshme për rifillimin gradual të operimit ajror dhe në rast nevoje, të liçensojë në mënyrë të përshpejtuar kontrollorët e trafikut ajror në përputhje me urdhrin e ministrit të Infrastrukturës dhe Energjisë,” – vijoi njoftimi.

Për situatën e krijuar në aeroportin “Nënë Tereza” policia ka ndaluar vetëm 3 kontrollorë të kompanisë “Albcontrol” për të cilët prokuroria ka ngritur zyrtarisht akuzë.

Konkretisht janë Armando Fezga, Flora Ndreca dhe Muhir Mezini të cilët janë ndaluar me urdhër të prokurorisë, e cila i akuzon ata për “shpërdorim detyre”.

Ndërkohë puna në aeroportin “Nënë Tereza” është bllokuar që prej ditës së djeshme.

Lexoni gjithashtu:

Mbi 100 qytetarë presin në aeroportin e Rinasit për të vijuar udhëtimet

Prokuroria ngre akuzë për tre kontrollorë të trafikut ajror, lihen të lirë të tjerët