Lektorë nga FBI-ja për Byronë Kombëtare të Hetimit, kërkohen edhe 32 hetues të tjerë

Njëzetetetë hetuesit e Byrosë Kombëtare të Hetimit (BKH), të cilët javën e kaluar morën përgjigjen pozitive mbi kushtet e sigurisë, kanë nisur trajnimet e para në Fakultetin e Sigurisë dhe Hetimit pranë Akademisë së Sigurisë.

Ata kanë nisur fazën e parë të kursit bazë nën drejtimin e ekspertëve të huaj ndërsa burime zyrtare thanë për Euronews Albania se në ditët në vijim për të ndjekur dhe certifikuar procesin do të mbërrijnë lektorë nga FBI-ja amerikane.

Ndërkohë që gjysma e strukturës së BKH-së pritet të marrë formë muajt e ardhshëm, për 32 hetuesit e tjerë që është hapur konkursi, afati i aplikimit skadon më 20 prill.

Për këtë drejtuesja e BKH-së Aida Hajnaj me anë të një thirrjeje inkurajon kandidatët që demonstrojnë integritet dhe profesionalizëm ti bashkohen ekipit që do të punojë ngushtësisht nën drejtimin e SPAK për të luftuar korrupsionin dhe krimin e organizuar.

“Ju bëjmë thirrje të gjithë kandidatëve ose kandidateve që demonstrojnë integritet, profesionalizëm dhe që plotësojnë kriteret të aplikojnë para datës 20 prill 2021. Shikoni njoftimin në faqen e BKH-së dhe ndiqni udhëzimet”, thuhet ndër të tjera në njoftimin e Hajnajt.

Në hapjen e parë të konkursit, aplikuan rreth 600 kandidatë por pas disa fazash vetëm 28 prej tyre u shpallën fitues. Ndërkohë për rihapjen e garës, BKH ka specifikuar pikëzimin e testeve, përfshi dhe atë fizik për të cilin pati jo pak kontestime.

LEXONI GJITHASHTU:

• Ambasadorët Kim dhe Soreca përshëndesin certifikimin e 28 hetuesve të BKH-së
• Kualifikimi i kandidatëve të BKH, ambasada amerikane: Mbështesim SPAK-un dhe ata që luftojnë krimin e korrupsionin