Restorantet në Kosovë hapen të hënën, premton ministri i Shëndetësisë

Lajme të mira për sektorin e gastronomisë në Kosovë pas një takimi që Oda e Hotelerisë ka pasur me ministrin e Shëndetësisë, Arben Vitia.

Të hënën, më 18 prill, pritet që baret, restorantet, dhe hotelet të rikthehen në punë. Pas takimit që kryetari i Odës së Hotelerisë, Hysen Sagajeva, ka pasur me ministrin Vitia është diskutuar që orari i ri i mbylljes të jetë mes 22.30 ose 23.00 të mbrëmjes.

Sipas komunikatës së lëshuar pas këtij takimi, i vetmi sektor i prekur do të jenë dasmat, që do të mund të zhvillohen vetëm në ambiente të jashtme të hapura, ose pasi vaksinimi i popullsisë të ketë arritur shkallën 60 për qind.