Superliga, Partizani merr përkohësisht kryesimin, Kukësi ndal Tiranën në barazim

Partizani mori përkohësisht kryesimin e kampionatit shqiptar të futbollit duke mundur 3-1 Kastriotin, ndërsa Tirana e Kukësi ndanë nga një pikë pas barazimit 2-2.

Në ndeshjet e vlefshme për javën e 28-të Partizani ia doli të përmbyste krutanët. Si fillim Klejdi Daci realizoi për Kastriotin, por më pas “Të kuqt” reaguan duke gjetur golin me mbrojtësin Esin Hakaj.

Pjesa e dytë pa Partizanin të realizojë edhe dy herë me Junior dhe Asani duke siguruar fitoren e trembëdhjetë për këtë sezon, të dytën në radhë pas barazimeve pa gola me Vllazninë dhe Teutën.

Paralelisht në ndeshjen tjetër, Tirana u ndal nga Kukësi në minutën e 89-të. Fillimisht verilindorët kishin realizuar me anë të Friday në pjesën e parë, por në të dytën u përmbysën 2-1 nga golat e Seferit dhe Elton Cales.

Mirëpo kur u duk se bardheblutë kishin siguruar fitoren, Ibraimi realizoi në të 89-ën duke bërë që Kukësi të marrë pikë domethënëse për të qëndruar në mesin e tabelës.

Takimet e sotme i hapin vend atyre të së dielës ku Skënderbeu luan me Teutën, dhe Vllaznia me Apoloninë.

Kampionati kryesohet momentalisht nga Partizani me 50 pikë, pas vijnë Teuta me 49 dhe Vllaznia me 47, të cilat kanë një ndeshje më pak.