Një muaj qeveria “Kurti 2”, analisti Ilir Ibrahimi: E papranueshme situata me vaksinat

Analisti Ilir Ibrahimi e komentoi si “situatë të papranueshme” situatën që po kalon Kosova, e cila mbetet e fundit në rajon që nuk ka nisur programin e vaksinimit kundër COVID-19.

Duke komentuar katër javët e para në qeveri të kryeministrit të Kosovës Albin Kurti, Ibrahimi tha për Euronews Albania se ai është përballur me disa kritika me vendimet e para që ka marrë. Ndër to ai përmendi “mbylljen dyjavore të gastronomisë teksa kufijtë e Kosovës ishin të hapura” si dhe “negociatat për vaksinën Pfizer dhe sulmin ndaj një media”.

Ibrahimi tha se në çështjen e vaksinave nuk ka një qëndrim publik në Kosovë se çfarë po bën dhe ku po bazohet qeveria.

“Jemi të fundit në rajon, nuk është se po shohim progres në këtë pikë teksa qeveria dhe partitë politike po vazhdojnë luftën mes njëri-tjetrit dhe kjo për popullsinë është e papranueshme,” – tha Ibrahimi.

BE i ka kërkuar qeverisë Kurti të mos nxitojë me ligjin për konfiskimin e parive të paluajtshme të konfiskuara dhe të konsultohet me partitë e tjera politike. Për Ibrahimin lëvizjet e qeverisë japin idenë se ato janë në kontekstin e “politikës populiste”, kjo pasi për situatën që ka Kosova prioritare janë çështje të tjera si pandemia.