Vrasja në Elbasan, delegacioni i BE: Të shmanget retorika nxitëse dhe gjuha e urrejtjes në këtë moment vendimtar të fushatës

Delegacioni i Bashkimit Evropian në Shqipëri ka reaguar lidhur me ngjarjen e rëndë të ndodhur këtë të mërkurë në Elbasan ku nga një përplasje me armë zjarri u vra një person dhe u plagosën 4 të tjerë.

Përmes një postimi në faqen zyrtare në Facebook bëhet thirrje për hetim të menjëhershëm të ngjarjes, ndërsa kërkohet shmangia e dhunës dhe retorikës me gjuhë urrejtjeje në këtë moment vendimtar të fushatës për zgjedhjet e së dielës.

“Akti i dhunshëm që ndodhi sot në Elbasan duhet të hetohet me shpejtësi nga autoritetet kompetente, dhe duhen bërë të qarta përgjegjësitë dhe të ndiqet plotësisht.

Ne bëjmë thirrje për përmbajtje dhe shmangie të dhunës, retorikës nxitëse dhe gjuhës së urrejtjes në këtë moment vendimtar të fushatës elektorale”, thuhet në reagimin e delegacionit të BE.

Më herët ambasada amerikane u bëri thirrje për vetëpërmbajtje liderëve të politikës në Shqipëri.