Gjykata lë në qeli 34-vjeçarin që plagosi 5 persona në xhaminë “Dine Hoxha” në kryeqytet

Gjykata e Tiranës ka lënë në masën e sigurisë “arrest me burg” 34-vjeçarin, Rudolf Nikollin, i cili 3 ditë më parë plagosi me thikë 5 persona në xhaminë “Dine Hoxha” në kryeqytet.

I riu teksa është njohur me akuzën e” veprimeve me qëllime terroriste”, ka deklaruar se është përndjekur nga besimtarë myslimanë prandaj ka ndërmarrë atë akt ekstrem, ndërsa ka shtuar se prej kohesh nuk ka konsumuar medikamentet që i kanë dhënë nga spitali psikiatrisë ku ka qenë shtruar pak kohë më parë.

Ndërkohë lidhur me këtë, prokurori i çështjes është shprehur në seancë se është marrë dosja që disponon spitali psikiatrik për këtë person.

Ngjarja e rëndë ndodhi mesditën e 19 prillit në kryeqytet.

Të plagosurit u dërguan në spital dhe ndodhen jashtë rrezikut për jetën.

Po kështu, Nikolli ishte në kërkim nga policia për një sulm, gjithashtu me thikë, të ndodhur në muajin mars në terminalin e autobusëve në Tiranë.

Lexoni gjithashtu:

Sulmi në xhaminë “Dine Hoxha” në Tiranë, Rudolf Nikolli akuzohet për “akt terrorist”