Monika Kryemadhi: Më 25 prill votoni për t’i dhënë fund tranzicionit

Lëvizja Socialiste për Integrim ka mbyllur sot fushatën elektorale në Qarkun e Tiranës. Në një miting të zhvilluar në sheshin “Nënë Tereza”, kryetarja e LSI, Monika Kryemadhi bëri thirrje që qytetarët më 25 prill të votojnë për t’i dhënë fund tranzicionit.

“Shqipëria është sot në rrezik është e tradhtuar nga qeverisja prandaj në këto zgjedhje u bëj thirrje të gjithë juve nga ky shesh i bekuar që të mos ndaloni për asnjë moment në këto ditë për të çuar çdo njeri drejt kutisë së votimit për të votuar LSI”, tha ajo.

Sipas znj. Kryemadhi qeveria e re do të kujdeset për ndryshimin e klimës së biznesit duke favorizuar biznesin e ndershëm dhe jo oligarkët që siç tha ajo janë “kthyer në shtojzovalle për të ruajtur paratë dhe koncesionet që u grabisin paratë shqiptarëve”.

“Lista e LSI është lista fituese dhe këtë e tregon sot kjo pjesëmarrje e jashtëzakonshme në sheshin ‘Nënë Tereza’. Më 25 prill shqiptar kanë në dorë zgjidhje ne zgjedhjeve të tyre, më 25 prill shqiptarë do t votojnë për ndryshimin duke votuar numrin 6 pasi ne kemi vënë zemrën për Shqipërinë”, deklaroi kryetarja e LSI.

Monika Kryemadhi u bëri thirrje të gjithë qytetarëve që më 25 prill t’i kthejnë Shqipërisë sovranitetin me votë dhe për të pasur një Shqipëri evropiane.