Zgjedhjet në mediat e huaja, nga Al-Jazeera tek Reuters, vëmendje procesit elektoral

Zgjedhjet parlamentare në Shqipëri nuk kaluan pa u pasqyruar në shtypin ndërkombëtar. Ndonëse në mënyrë të moderuar, agjencitë kryesore të lajmeve raportuan për procesin, duke e vënë theksin tek përballja, sipas tyre e ashpër, mes Partisw Socialiste dhe asaj demokrate.

Në Itali, agjencia e lajmeve “ANSA” i kushtoi vëmendje përpjekjeve të kryeministrit Edi Rama për të fituar mandatin e tretë, si dhe emigrantëve, që përbëjnë 30% të fuqisë elektorale, por që nuk gëzojnë të drejtën e votës.

Ndërkohë, “Al Jazeera” e nisi artikullin kushtuar vendit tonë me titullin “Shqipëria shkon në zgjedhje pas një fushate elektorale të zjarrtë”. Agjencia prestigjoze e lajmeve e vuri theksin tek ngjarjet që i paraprinë ditës së zgjedhjeve, sidomos tek përplasjet e armatosura mes mbështetësve të dy blloqeve kryesore politike.

Gjithashtu, përveç përballjes mes liderëve politikë Edi Rama dhe Lulzim Basha, organi mediatik arab komentoi edhe përpjekjet e vendit për t’u anëtarësuar në BE, duke shkruar se pavarësisht marrjes së statusit të kandidatit në 2014-n, vendi nuk ka bërë progres me reformat.

Në të njëjtën linjë, agjencia e lajmeve “Reuters” shkroi për një betejë “kokë më kokë” mes Partisë Socialiste dhe opozitës, në një nga vendet më të varfëra të Evropës, i gërryer nga korrupsioni.

Edhe “Reuters” foli gjithashtu për mungesën e reformave në fushën e integrimit, si dhe për “historinë e dhunës” që Shqipëria ka pas në proceset elektorale, 3 dekada nga rënia e komunizmit.

Ndërsa “DW” foli për një Shqipëri politikisht të përçarë, ku beteja elektorale do të vijojë deri në numërimin e votës së fundit. Sipas agjencisë së lajmeve, edhe fushata që i parapriu ditës së votimit ishte e hidhur dhe e karakterizuar nga dhuna mes mbështetësve rivalë. Gjithashtu, “DW” nënvizoi edhe numrin e lartë të vëzhguesve të OSBE-së.

Nga mediat amerikane, “Associated Press” foli për zgjedhje në kohë pandemie, akuzash për korrupsion nga opozita dhe për rivalitetin e ashpër mes dy partive kryesore politike.

Agjencia e lajmeve i kushtoi gjithashtu vëmendje votimit të pjesshëm elektronik dhe po ashtu depolitizimit të pjesshëm të komisionit elektoral. 

LEXONI GJITHASHTU:

• Nis zyrtarisht numërimi i votave për zgjedhjet e 25 prillit, publikohen rezultatet e para
• Exit Poll-i kombëtar, PS me 68-72 mandate, PD me 60-64
• Exit Poll i Euronews Albania dhe MRB citohet në mediat prestigjioze ndërkombëtare