Putin: Jam i gatshëm të bisedoj me Trumpin për Ukrainën

Presidenti rus, Vladimir Putin, tha se është i gatshëm për bisedime me homologun e tij amerikan, Donald Trump, për Ukrainën, duke e quajtur atë udhëheqës “të mençur” i cili do të mund ta kishte parandaluar nisjen e konfliktit më 2022.

Kievi reagoi menjëherë, duke paralajmëruar kundër përjashtimit të tij nga negociatat.

Udhëheqësi rus nuk tha se kur këto bisedime do të mbaheshin dhe Kremlini ka thënë më herët se po pret për “sinjale” nga Uashingtoni, pavarësisht se Trump një ditë më herët paralajmëroi se është i gatshëm të takohet “menjëherë” me Putinin.

“Ne gjithmonë kemi thënë, dhe unë dua ta theksoj sërish, se ne jemi të gatshëm për këto negociata sa i përket çështjes ukrainase”, tha Putin.

Putin po ashtu përsëriti pretendimin e pabazuar të presidentit amerikan se kishte fituar zgjedhjet presidenciale amerikane kundër Joe Biden më 2020.

Trump, që u inaugurua të hënën, e ka quajtur konfliktin “qesharak” dhe e ka kërcënuar Rusinë me sanksione ekonomike nëse nuk pajtohet të ndalë luftën.

Ai po ashtu ka thënë se nëse ulen çmimet e naftës, atëherë lufta do të përfundonte shpejt, pasi Rusia përdor të ardhurat nga nafta për të financuar luftën e saj kundër Ukrainës.

Pas deklaratave të Putinit, Kievi reagoi të premten dhe tha se nuk duhet të përjashtohet nga bisedimet.

LEXONI GJITHASHTU:

• Trump thotë se do të takohet menjëherë me Putinin për t’i dhënë fund luftës
• Rusia: Asgjë e re në kërcënimet e Trump rreth luftës së Moskës në Ukrainë