KQZ gjobit 18 KZAZ për shkak se nuk kanë numëruar mbi 50% të votave

KQZ-ja ka gjobitur 18 KZAZ në vend, për shkak se numëruesit nuk ja kanë dalë të numërojnë mbi 50% të votave. Gjoba ka vlerën e 3000 lekëve.

“Duke patur parasysh ecurinë e ditës së sotme, më lejoni të ju informoj se KQZ ka vendosur sanksionin administrativ prej 3 mijë lekësh për të gjithë anëtarët e komisioneve të zonave të administrimit zgjedhor, të cilët deri në këto momente kanë numëruar më pak se 50% të QV, pra për 18 KZAZ”, tha Drilona Hoxhaj në një deklaratë.

Ritmi i numërimit të votave nga këto KZAZ ka bërë që procesi i numërimit të ngadalësohet, ndërsa mësohet se anëtarët e gjobitur janë paralajmëruar që të përshpejtojnë procesin e numërimit.

“Sipas nenit 122 të Kodit Zgjedhor, do të duhet të kishte përfunduar minimalisht 50% e qendrave të votimit. Pas disa paralajmërimeve nuk është reflektuar dhe si rrjedhojë është vendosur gjobë”, raportoi gazetari i Euronews Albania.

KQZ-ja ka deklaruar më parë se rezultati i numërimit do të dalë pas 48 orësh nga fillimi i numërimit.