Kurti nis takimet zyrtare në Bruksel, priten takime me zyrtarë të BE

Kryeministri i Kosovës Albin Kurti nis sot takimet zyrtare në Bruksel, në vizitën e tij të parë që kur mori mandatin në krye të Qeverisë pas zgjedhjeve të 14 shkurtit.

Në delegacion me kryeministrin janë edhe dy zëvendëskryeministra, Donika Gërvalla-Schwartz, dhe Besnik Bislimi.

Kurti fillimisht do të ketë takim me kryeministrin e Belgjikës Aleksandar De Croo, për të vazhduar më pas me takimet në Komisionin Evropian. Kurti pritet të takojë edhe presidentin e Parlamentit Evropian, David Sasoli.

Ndërkaq, nëser do te ketë takime me presidenten e Komisionit Evropian Ursula von der Leyen dhe me Përfaqësuesin e lartë për politikë të jashtme dhe siguri, Josep Borrell si dhe me Sekretarin e Përgjithshëm të NATO-s, Jens Stoltenberg.

Më herët gjatë javës zyrtarët e lartë të BE-së për vazhdimin e dialogut kanë biseduar edhe me presidentin Serbisë Aleksandar Vuçiç e madje Përfaqësuesi i lartë Josep Borrell ka përmendur edhe datën 11 maj si ditë e caktuar për takimin Kurti-Vuçiç.

Qeveria e Kosovës ka mohuar se është dakordësuar një datë e tillë. Ndërkohë, në BE kanë sqaruar se ajo është vetëm një “datë e mundshme” dhe se “po punohet për të caktuar një datë për takimin e tyre”.