Makina futet në fushën sportive, humb jetën një i mitur në Britaninë e Madhe

Një tragjedi ka ndodhur në Cumbria në Britaninë e Madhe, ku një fëmijë ka humbur jetën dhe një tjetër është plagosur pasi një makine ka hyrë në një fushë sportive.

Policia ka njoftuar se u thirrën në vendngjarje në orën 16:58, për një aksident që përfshinte një BMW i40 dhe dy fëmijë në fushën e Klubit të Futbollit të Rugby Union Kendal, në Shap Road, Kendal.

Sipas policisë së Cumbria, një nga fëmijët ka ndërruar jetë, ndërsa i dyti po merr trajtim nga mjekët.

Një burrë, rreth të 40-ave, është arrestuar me dyshimin se ka shkaktuar vdekjen duke drejtuar makinën në mënyrë të rrezikshme.

Një zëdhënës i policisë tha se:

“Hetuesit specialistë janë në vendngjarje dhe zona është rrethuar ndërsa po zhvillohen hetimet fillestare”. Sipas forcave të rendit, incidenti nuk ka lidhje me terrorizmin. Familjarët e afërt të fëmijëve janë informuar për ngjarjen tragjike.

Në një postim në Facebook, Klubi i Rugby Kendal shprehu pikëllimin për këtë ngjarje, duke shkruar:

“Jemi thellësisht të trishtuar për të konfirmuar që ndodhi një incident sot në Klub. Mendimet tona janë me familjen dhe miqtë e tyre dhe kërkojmë që të respektohet privatësia e të gjithë të përfshirëve në këtë kohë të vështirë.”

Klubi dhe objektet e tij janë mbyllur përkohësisht dhe po bashkëpunojnë plotësisht me autoritetet. Deputeti Tim Farron, i cili përfaqëson zonën e Kendalit, postoi:

“Ky është një lajm shkatërrues, krejtësisht zemërthyes. Lutem për fëmijët, për familjet dhe miqtë e tyre. Komuniteti ynë në Kendal është i shtangur dhe në zi.”

LEXONI GJITHASHTU:

• Qeveria miraton vendimin, mbyllet për 1 vit TikTok në Shqipëri
• E solli në Tiranë për ta vrarë, autori rezulton babai i 24-vjeçares: Zbardhet motivi