Zelensky njofton vizitën në Arabinë Saudite, pjesë e takimit edhe SHBA-ja

Uashingtoni dhe Kievi do të zhvillojnë bisedime në Arabinë Saudite më 10 mars për bisedime me princin e kurorës Mohammed bin Salman Al Saud, ka konfirmuar kështu presidenti i Ukrainës, Volodymyr Zelensky, duke shpresuar se do të jetë “një takim kuptimplotë”.

“Vizita ime në Arabinë Saudite për një takim me princin e kurorës është planifikuar për të hënën. Pas kësaj, ekipi im do të qëndrojë në Arabinë Saudite për të punuar me partnerët amerikanë”, shkroi Zelensky në Telegram.

Megjithëse Zelensky do të ndodhet në mbretërinë e Gjirit, ai nuk do të marrë pjesë drejtpërdrejt në negociata. Ai theksoi se Ukraina po punon për të arritur një paqe “të shpejtë dhe të qëndrueshme”.

I dërguari special i presidentit amerikan Donald Trump, Steve Witkoff, deklaroi se ekipi amerikan synon të diskutojë një “kornizë” për paqen, me qëllimin për t’i dhënë fund konfliktit mes Rusisë dhe Ukrainës.

Ky zhvillim vjen pas përplasjes publike mes Zelenskyt dhe Trumpit javën e kaluar në Shtëpinë e Bardhë, ku Trump deklaroi se presidenti ukrainas “nuk ishte gati për t’i dhënë fund luftimeve”. Përplasja çoi në vendimin e SHBA-së për të ndaluar ndihmën ushtarake për Ukrainën dhe ndarjen e inteligjencës.

Zelensky, i cili ka shprehur keqardhje për incidentin, po përpiqet të riparojë marrëdhëniet me SHBA-në, që mbetet furnizuesi më i madh ushtarak i Ukrainës.

Në një seri postimesh në rrjetin social X, Zelensky njoftoi bisedimet dhe nënvizoi rëndësinë e presionit ndërkombëtar mbi Moskën për t’i dhënë fund luftës.

“Ekipet ukrainase dhe amerikane kanë rifilluar punën dhe shpresojmë që javën e ardhshme të kemi një takim kuptimplotë”, shkroi ai.

Ai gjithashtu bëri një referencë ndaj një plani armëpushimi të propozuar nga presidenti francez Emmanuel Macron, i cili sugjeroi ndalimin e sulmeve në ajër dhe në det, si dhe një fund të goditjeve ndaj infrastrukturës energjetike dhe civile.

LEXONI GJITHASHTU:

• Trump: SHBA kërkon dialog me Rusinë dhe Kinën për heqjen e armëve bërthamore
• Trump “dëbon” ukrainasit, u heq statusin ligjor 240 mijë të arratisurve nga lufta