Turqia në izolim total, Erdogan merr vendimin pas rritjes së infektimeve dhe vdekjeve

Njerëzit në Turqi mbushën dyqanet, marketet dhe braktisën qytetet e mëdha për fshatrat, ose bregun jugor të vendit, që po bëhet gati të hyjë në bllokadën më të rreptë të pandemisë.

Ishte presidenti Erdogan që vendosi izolimin total nga e enjtja deri më 17 maj.

“Përveç sektorit të prodhimit, manifakturës, ushqimit, pastrimit dhe atij shëndetësor, që do bëjnë përjashtim, të gjitha aktivitetet e tjera do pezullohen”, tha z. Erdogan.

Bëhet fjalë për izolimin e parë kombëtar që do zgjasë thuajse 3 javë. Më parë, qeveria turke kishte zgjedhur bllokada të pjesshme, ose shtetrrethim në fundjavë për të reduktuar impaktin ekonomik.

Në kuadër të kufizimeve të reja, banorëve u kërkohet të qëndrojnë në shtëpitë e tyre, veç rasteve kur u duhet të blejnë ushqime dhe për nevoja të tjera thelbësore.

Bizneset dhe industritë që do bëjnë përjashtim janë fabrikat, agrikultura, shëndetësia dhe kompanitë e logjistikës.