Medvedev ironi pas bisedës Trump-Putin: Pjata kryesore në tryezë është “pulë Kievi”

Zëvendëskryetari i Këshillit të Sigurisë së Rusisë, Dmitry Medvedev, ka komentuar në rrjetin social X bisedën telefonike mes presidentëve Vladimir Putin dhe Donald Trump, duke e krahasuar atë me një “darkë” diplomatike, ku vetëm Rusia dhe SHBA janë të pranishme.

“Një bisedë telefonike mes presidentëve Putin dhe Trump konfirmoi idenë e njohur – në tryezë janë vetëm Rusia dhe Amerika. Në menu ka lakër Brukseli, peshk dhe patatina britanike dhe gjel parizien. Pjata kryesore është “pulë Kievi”. Një vakt i këndshëm!” – shkroi Medvedev në anglisht, duke ironizuar vendet e tjera që janë lënë jashtë negociatave.

Deklarata e tij erdhi si kundërpërgjigje ndaj presidentit ukrainas, Volodymyr Zelensky, i cili më herët kishte theksuar se Ukraina “nuk është sallatë apo komposto për të qenë në menunë e tryezës SHBA-Rusi”.

Biseda telefonike mes Putin dhe Trump, e mbajtur më 18 mars, u fokusua në situatën në Ukrainë, me theks në parandalimin e përshkallëzimit të konfliktit.

Kremlini njoftoi se Putin kishte pranuar propozimin e presidentit amerikan për një ndalim të ndërsjellë të sulmeve ndaj infrastrukturës energjetike për 30 ditë.

Sipas një deklarate të Shtëpisë së Bardhë, palët ranë dakord të nisin negociata teknike për vendosjen e një “armëpushimi në Detin e Zi, një armëpushimi të plotë dhe arritjen e një paqeje të përhershme”.

Nga ana e tij, Kremlini theksoi se një kusht kyç për gjetjen e një zgjidhjeje për konfliktin mbetet “ndërprerja e plotë e ndihmës ushtarake në Ukrainë, por dhe e informacionit të inteligjencës për Kievin”.

LEXONI GJITHASHTU:

• Biseda mes Trump dhe Putin, ja çështjet kryesore të diskutuara
• Putin urdhëron ushtrinë të ndalojë sulmet në infrastrukturën energjetike të Ukrainës