Itali/ Shkrumbohen disa automjete Tesla në Romë, hetime për zjarrvënie të qëllimshme

Një zjarr që shpërtheu në një përfaqësi të makinave Tesla në periferi të Romës ka shkatërruar të paktën 16 automjete.

Ngjarja ndodhi të hënën në mëngjes, por fatmirësisht nuk pati të lënduar, pasi nuk kishte asnjë person në momentin e shpërthimit të zjarrit.

Shërbimi zjarrfikës i Romës tha se po hetonte të gjitha mundësitë për shkakun e zjarrit, duke përfshirë mundësinë e zjarrvënies së qëllimshme.

Policia ka intervistuar pronarët e dyqanit dhe po shqyrton pamjet e kamerave të sigurisë për të zbardhur ngjarjen.

Ky incident është i fundit në një seri ngjarjesh të ngjashme, ku Tesla ka qenë objekt i vandalizmit. Së fundmi, makina Tesla janë shkatërruar edhe në të tjera qytete të Italisë, duke përfshirë akte vandalizmi me mesazhe kundër Elon Musk dhe Donald Trump, që janë shkruar me bojë llak në automjetet e dëmtuara.

Një tjetër përfaqësi e Tesla-s u dogj një javë më parë në veri të Romës, duke shkatërruar 30 makina, përfshirë Tesla të përdorura. Fillimisht, hetimet sugjeruan një defekt elektrik si shkakun e zjarrit, por hetimet janë ende në proces.

Po ashtu, disa Tesla në lagjen Garbatella të Romës, një zonë e njohur për lidhjet e forta me kryeministrin italian Giorgia Meloni, janë shpërfytyruar. Megjithatë, Meloni nuk ka komentuar ende mbi këto incidente. Përfaqësitë e Tesla-s në Milano janë gjithashtu shënjestruar nga grupe mjedisore gjatë javëve të fundit.

Tesla Italia ka njoftuar se është duke bashkëpunuar me policinë dhe ka dorëzuar videot nga kamerat e sigurisë të automjeteve, të cilat regjistrojnë edhe kur makinat janë të fikura.

Një reporter i Associated Press raportoi se 16 makina ishin shkatërruar në këtë ngjarje. Elon Musk reagoi menjëherë në platformën e tij X (ish-Twitter), duke e quajtur këtë akt “terrorizëm”.

Tesla është shënjestruar në protesta të shumta për lidhjen e Musk me administratën Trump, dhe shitjet e makinave Tesla në Europë kanë rënë 49% gjatë dy muajve të parë të vitit, pavarësisht se shitjet e përgjithshme të automjeteve elektrike janë rritur.

LEXONI GJITHASHTU:

• Trump: Ata që sabotojnë makinat Tesla mund të përballen me 20 vjet burg
• Sulmohet me armë qendra e shitjeve të automjeteve Tesla në Las Vegas