U arrestua në intervistën për shtetësinë, lirohet aktivisti palestinez në SHBA

Një gjyqtar urdhëroi këtë të mërkurë lirimin e aktivistit palestinezi i cili udhëhoqi protestat kundër luftës në Gaza si student në Universitetin e Kolumbias.

Mohsen Mahdawi, i cili ka rezidencë të përhershme në SHBA ose statusin e “kartës së gjelbër”, u ndalua nga Shërbimi i Imigracionit dhe Doganave të SHBA-së (ICE) kur u paraqit në një intervistë për shtetësi amerikane në Vermont në mesin e prillit.

Ekipi ligjor i Mahdawi kërkoi lirimin e tij duke pretenduar burgosje të paligjshme.

Qeveria amerikane tha se ai po minonte politikën e jashtme të SHBA-së, ndërsa Luna Droubi, një nga avokatet e tij, argumentoi se arrestimi ishte “në hakmarrje të drejtpërdrejtë për avokimin e tij në emër të palestinezëve dhe për shkak të identitetit të tij si palestinez”.

Gjykatësi i Distriktit të Vermontit, Geoffrey Crawford, urdhëroi lirimin me kusht të Mohsen Mahdawi nga burgu të mërkurën, në pritje të vendimit të gjykatës mbi peticionin habeas që kundërshton paraburgimin e tij, sipas një deklarate nga Unioni Amerikan për Liritë Civile (ACLU), i cili është pjesë e përfaqësimit të tij ligjor.

Gjykatësi hodhi poshtë një kërkesë nga avokatët e qeverisë për të shtyrë lirimin e tij me shtatë ditë.

Në deklaratë, znj. Droubi tha se pretendimet kundër tij janë “të pabaza” dhe një “turp për Kushtetutën e SHBA-së”. Ajo tha se ishte “e lehtësuar” që z. Mahdawi ishte liruar dhe u zotua të “vazhdojë të luftojë derisa Mohsen të jetë i lirë përgjithmonë”.

Mahdawi falënderoi mbështetësit jashtë sallës së gjyqit, duke thënë: “Ne jemi pro paqes dhe kundër luftës. Për popullin tim në Palestinë: E ndiej dhimbjen tuaj, e shoh vuajtjen tuaj; dhe shoh lirinë dhe ajo është shumë, shumë shpejt.”

Një ditë para arrestimit të tij, zoti Mahdawi i kishte thënë CBS News, partnerit amerikan të BBC-së, se besonte që intervista për shtetësi mund të ishte një sajesë.

“Është ndjesia e parë sikur, e kam pritur këtë për më shumë se një vit,” tha z. Mahdawi. “Dhe ndjesia tjetër është si, prisni një minutë. A është kjo një kurth mjalti?”

Disa politikanë të shquar, përfshirë senatorin e pavarur Bernie Sanders i cili përfaqëson Vermontin, kanë folur në mbështetje të zotit Mahdawi dhe kanë bërë thirrje për lirimin e tij. Autoritetet amerikane kanë ndaluar shumë studentë dhe të diplomuar të përfshirë në lëvizjen protestuese kundër luftës, përfshirë Mahmoud Khalil të Universitetit të Kolumbias dhe Rumeysa Ozturk të Universitetit Tufts.

LEXONI GJITHASHTU:

• “Asgjë nuk do më ndalë”, Trump akuzon gjyqtarët dhe promovon dëbimin e emigrantëve
• Kryeministri i Katarit: Situata në Gaza është njollë në ndërgjegjen e gjithë botës