“Vendim i vonuar, nuk dihet efikasiteti”, Qiraxhi dhe Skënderi komentojnë rikthimin e studentëve në auditorë

Vendimi i Komitetit Teknik të Ekspertëve për rikthimin e studentëve në auditorë vetëm për sezonin e provimeve sipas Migen Qiraxhit nga “Qëndresa Qytetare” është një vendim i vonuar, nga i cili mund të dyshohet efikasiteti.

“Është shumë e rëndësishme për të kuptuar atë që po ndodh. Ne kemi një hapje të universitetit por nuk kemi një hapje të mësimdhënies, pra procesi më i rëndësishëm që ndodh në universitet, ai i marrjes së dijes, sigurisht që ka kaluar përgjatë gjithë vitit online, ndërkohë që tani kemi vetëm një ftesë për të bërë provimet në formë fizike,” – shpjegoi Qiraxhi.

Sipas tij ministria e Arsimit do duhet të kishte një analizë për efikasitetin e dijeve dhe jo të konkretizonte më tepër shprehjen “rëndësi ka diploma në xhep”.

Elsa Skënderi, zv.dekane e Fakultetit të Historisë dhe Filologjisë ndante të njëjtin mendim me Qiraxhin kur u shpreh se ish dashur që studentët të kishin qenë pjesë e auditorëve shumë më parë dhe vendimi është i vonuar.

Ajo tha për Euronews Albania se vendimi sidoqoftë duhet përshëndetur, me shpresën se mund të ndihmojë për ata studentë që kanë pasur vështirësi në aksesimin e mësimit online.

Sërish, Qiraxhi dhe Skënderi ishin të mendimin se atashimi i studentëve me godinat ndihmon në të procesin e të nxënit dhe ky vendim për konsultime do të jetë pozitiv por ngel për t’u diskutuar efikasiteti.

LEXONI GJITHASHTU:

• Komiteti Teknik i Ekspertëve në konferencë: Hapen universitetet, mbetet në fuqi ora policore
• Mësimi online, Qiraxhi: Studentët shpenzojnë dy milion euro në muaj për internet, të parimbursuara
• Mësim online pa afat, Migen Qiraxhi: Qeveria mbylli tempujt e dijes, por ka lënë hapur restorantet dhe palestrat