Shqiptari nga Kosova Agim Agushi vendos rekord Guinness në xhonglimin e topit

Ditën e enjte, Agim Agushi, ka arritur që të regjistrojë një tjetër rekord në librin Guinness.

Shqiptari nga Kosova ia ka dalë që të veshë dhe zhveshë 165 herë fanellën e tij, duke mbajtur topin me kokë pa ndërprerje. Rekordi i mëparshëm botëror, ishte vendosur po nga ai në Kosovë me 156 veshje-zhveshje.

Prej pesë viteve Agim Agushi provoi të thyejë rekordin, por këtë gjë më në fund ia arriti në Shkodër.

“Nga sot edhe Shkodra është në librin e rekordeve Guinness,” – u shpreh Agushi pas suksesit duke treguar se kishte ndjerë emocione dhe vështirësi fillimisht nga fakti se ushtrimi u bë në mjediset e Këshillit Bashkiak Shkodër.

Më 4 qershor, në Katar, Agushi do të synojë tjetër rekord Guinnes, atë të xhonglimit të topit me kokë dhe ngjitjen së prapthi të 1750 shkallëve.