Masakër në Brazil, 25 të vrarë në operacionin antidrogë të policisë

Banorët e zonës Jacarezinho, në pjesën veriore të Rio de Janeiros, kërkuan drejtësi pasi një operacion i policisë kundër trafikut të drogës përfundoi me gjakderdhje.

Një agjent policie u vra bashkë me 24 anëtarë të një bande gjatë operacionit, i zhvilluar në distriktin e varfër që ka rreth 40 mijë banorë.

Një prej tyre tregoi momentin kur policia po ndiqte një të dyshuar.

“Rreth orës 8 të mëngjesit, një kriminel erdhi në shtëpinë time. Duke qenë se jetoj në një lagje të varfër nuk kisha mundësi ta nxirrja jashtë. Ai ishte i plagosur dhe kur erdhi policia më pyeti nëse kisha dikë në shtëpinë time. Konfirmova me kokë, më pas ata shkuan në dhomën e fëmijëve të mi dhe e vranë atë”, thotë Flavia Luciana, banore e Rio de Janeiro.

Policia sekuestroi 16 pistoleta, 6 pushkë, armë automatike, 12 granata dhe një shotgun, si dhe arrestoi 6 të dyshuar.

“Ekzekutimi i vetëm ishte ai i një oficeri policie, që u vra me gjakftohtësi nga trafikantët. Vdekjet e tjera fatkeqësisht ndodhë kur ata qëlluan ndaj policisë. Për pasojë u neutralizuan. Kaq e thjesht është”, shprehet Felipe Curi, drejtor i përgjithshëm i forcave speciale.

Policia deklaron se po hetonte rekrutimin e adoleshentëve nga banda Komanda e Kuqe, e përfshirë në trafikun e drogës dhe armëve. Zona ku u krye aksioni është një prej bazave të grupit.