Irani refuzon kushtin kryesor të SHBA-së për programin bërthamor

Zëvendësministri i Jashtëm i Iranit, Majid Tahtravanchi, tha se negociatat bërthamore midis Iranit dhe Shteteve të Bashkuara të Amerikës “nuk do të çojnë askund” nëse Uashingtoni këmbëngul që Teherani të zvogëlojë aktivitetin e tij të pasurimit të uraniumit në zero, raportuan sot mediat shtetërore iraniane.

“Qëndrimi ynë për pasurimin (e uraniumit) është i qartë dhe ne kemi deklaruar vazhdimisht se është një arritje kombëtare nga e cila nuk do të heqim dorë”, tha Tahtravanchi, raportoi Reuters.

Presidenti iranian Masud Pezeshkiyan tha dje se Irani do të vazhdojë negociatat me SHBA-në për programin e tij bërthamor, por se nuk do të heqë dorë nga të drejtat e tij për shkak të kërcënimeve të Uashingtonit.

Negociatat midis SHBA-së dhe Iranit, në të cilat janë mbajtur disa takime deri më tani në Muscat dhe Romë, kanë arritur në nivelin e “ekspertëve”, që do të thotë se palët po përpiqen të arrijnë një marrëveshje mbi detajet e një marrëveshjeje të mundshme.

I dërguari i posaçëm i SHBA-së për Lindjen e Mesme, Steve Witkoff, përsëriti dje qëndrimin e Uashingtonit se çdo marrëveshje e re midis SHBA-së dhe Iranit duhet të përfshijë një marrëveshje për mospasurimin e uraniumit, i cili është një rrugë e mundshme drejt zhvillimit të bombave bërthamore.