Kërcënoi policinë me granatë, plagoset dhe arrestohet 51-vjeçari

Punonjës të Komisariatit të Policisë Gjirokastër në bashkëpunim me Forcat “Shqiponja” kanë arrestuar një 51-vjeçar të dënuar më parë për vrasje dhe kontrabandë.

Efektivët e policisë shkuan në banesën e të ndaluarit pasi informacioneve se dispononte armë zjarri në banesë.

Në momentin që shërbimet e Policisë janë afruar pranë banesës së tij, shtetasi A. I. ka marrë një granatë difensive me vete dhe ka tentuar të largohet duke kërcënuar punonjësit e Policisë që të mos e ndiqnin, pasi do t’i qëllonte.

Shërbimet e Policisë, nisur nga rrezikshmëria që paraqiste ky person, kanë rrethuar zonën në një perimetër të gjerë dhe falë veprimeve dhe ndërhyrjes profesionale kanë bërë të mundur neutralizimin dhe prangosjen e 51-vjeçarit, i cili mbante me vete një granatë difensive të montuar me ndezës universal.

Nga kontrolli në banesë, Policia gjeti dhe sekuestroi në cilësinë e provës materiale 1 armë zjarri automatik, një krehër dhe 19 fishekë ndërsa materialet procedurale i kaluan Prokurorisë pranë Gjykatës së Shkallës së Parë Gjirokastër, për veprime të mëtejshme.