Annalena Baerbock zgjidhet presidente e Asamblesë së Përgjithshme të OKB-së

Ish-ministrja e Jashtme e Gjermanisë, Annalena Baerbock është zgjedhur presidente e Asamblesë së Përgjithshme të Kombeve të Bashkuara me një shumicë dërrmuese votash, të hënën në Nju Jork.

Përmes një votimi të fshehtë, të mbajtur në këtë institucion – më të madhin të Kombeve të Bashkuara – Baerbock, 44-vjeçare, ka siguruar 167 vota, 14 anëtarë kanë abstenuar, ndërsa shtatë të tjerë kanë votuar për kandidaten tjetër.

Zgjedhja e saj në seancën plenare para 193 vendeve anëtare të OKB-së është konsideruar formalitet, mirëpo votimi sekret është mbajtur, siç është raportuar, me kërkesë të Rusisë.

Në fjalimin e saj, Baerbock ka thënë se dëshiron të udhëheqë këtë institucion si “ndërmjetëse e sinqertë dhe unifikuese”.

“Dera ime do të jetë gjithmonë e hapur për secilin”, ka thënë ajo.

Duke iu referuar krizave të shumta në botë, ajo ka thënë se “po jetojmë në kohë sfiduese, dhe jemi duke ecur në një litar të tendosur të pasigurisë”.

“Por, ne kemi jetuar edhe më parë nëpër kësi periudha të vështira. Na përket neve që të merremi me këto sfida”.

Baerbock pritet të inaugurohet më 9 shtator, pak para nisjes së seancës vjetore të Asamblesë së Përgjithshme të Kombeve të Bashkuara.

Kjo pozitë njëvjeçare është kryesisht ceremoniale, dhe nuk duhet të ngatërrohet me rolin e Sekretarit të Përgjithshëm të OKB-së, Antonio Guterres.

Guterres ka shprehur mbështetje të plotë për Baerbockun, duke përmendur përvojën e saj si ministre e Jashtme e Gjermanisë.

LEXONI GJITHASHTU:

• OKB: Irani po rrit pasurimin e uraniumit
• OKB: 100% e banorëve të Gazës janë në rrezik nga uria